Qırım.Aqiqat frilanseri Vladıslav Yesıpenko, işğal etilgen Qırımda Rusiye quvetçileri tarafından tutulğan soñ, işkencege oğratılğanı aqqında tarif etti. Jurnalistniñ ikâyesi Qırım.Aqiqatqa (Azatlıq Radiosınıñ leyhası) bergen intervyüsına kirdi.
Yesıpenkonıñ aytqanına köre, onı tutıp alğan soñ, bir şey körmesin ve eşitmesin dep, qulaqlıq ve qara közlükler taqıp, avtobusqa oturtqanlar. Soñra onı yerastı odağa ketirip, soyundırğan ve yerge yatqızğanlar.
"Bundan ğayrı, qulaqlarıma tel taqıp, elektrik aqımını qullandılar. Ağrı pek şiddetli edi, üç, belki de beş daqqa devam etti. Yani, menim içimden elektrik aqımı keçe edi", — dedi freelancer.
Elektriknen işkencege oğratqan soñ, onı köteklemege başlağanlar.
"Meni ayaqnen urmağa başladılar, başıma azca urdılar, esasen kevdeme, ayaqlarıma. Bu 15 daqqa devam etti. Soñra meni köterip, kürsüge oturttılar ve sualler bermege başladılar. "Ukrayina agentisiñmi? Adlar, kelüvler, paroller", — dep qayd etti Yesipenko.
Onıñ qayd etkenine köre, Rusiye quvetçileri başta bir şey talap etmegen edi, işkencege oğratqanlarnıñ maqsadı ise, onıñ iradesini bozmaq ve qorquzmaq edi.
Vladıslav Yesıpenko "Qırım.Aqiqat" leyhasınıñ frilanseridir (Azatlıq Radiosı). O, Qırımda içtimaiy ve ekologik meselelerni aydınlattı, soqaq soravlarını ve işğal etilgen yarımadada ayat aqqında reportajlarnı çıqara edi. 2021 senesi saban ayınıñ 10-nda Rusiye FSB-sınıñ hadimleri tarafından Yesipenkonı Ukrayina mahsus hızmetleri içün malümat toplağanında ve maşnasında "öz başına yapılğan patlav cihazını" saqlağanında qabaatlap tuttılar.
