Qırımtatar Milliy Meclisi işğal etilgen Qırımnen bağlı Ukrayina ve Qırım tamır halqınıñ iştiragi olmadan qabul etilgen qararlarğa qarşı çıqtı. Beyanat, ABD ve Rusiye prezidentleriniñ Alâskada keçirilecek muzakereleri vaziyetinde seslendirilgen.
Mecliste Qırımnıñ Rusiye territoriyası olaraq em de-fakto em de-yure tanılması "qabul etilmez" olacağını qayd ettiler.
"Ukrayina devleti ve tamır qırımtatar halqınıñ iştiragi olmadan Qırımnıñ taqdiri aqqında bir qarar almağa kimseniñ aqqı yoq" — dep bildirdi Meclis reisi Refat Çubarov.
O, Qırımnıñ kelecegini yalıñız Ukrayinanıñ topraq bütünliginiñ ğayrıdan tiklenmesi ve qırımtatar halqınıñ Ukrayina devleti çerçivesinde öz-özüni belgilev aqqınıñ yerine ketirilmesi kontekstinde baqmaq kerek, dep bildirdi.
Meclis Prezidiumı, Ukrayina ve qırımtatar halqınıñ iştiragi olmadan Qırımnen bağlı kuluar añlaşmalar Ukrayina suvereniteti ve tamır halqınıñ aqlarınıñ bozuluvı olaraq tanılacağı aqqında tenbiley.
"Qırımtatar halqı Meclisiniñ prezidiumı Rusiye-Ukrayina cenkine ait er bir halqara muzakere iştirakçilerini tecavuzcı devletniñ areketlerini toqtatmağa yönelgen qararlı tedbirlerni körmege ve Rusiyeni halqara qanun normalarına ve printsiplerine qattı riayet etmege mecbur etecek mehanizmlerni qullanmağa çağıra", — dep yazıla beyanatta.
Arman ayınıñ 11-de Donald Tramp Ukrayina ve Rusiye arasında 2bir qaç territoriya almaştıruvı" imkânına yol berdi ve bu iş boyunca konstitutsion añlaşma kerekligi aqqında Ukrayina yolbaşçılığınıñ fikirlerinden narazılığını bildirdi.
Volodımır Zelenskıy, Ukrayina topraqlarını Rusiyege bermeycek, dep bildirdi. Ne onı, ne de avropalı liderlerni Alâska sammitine davet etmediler, lâkin ABD memuriyeti ve prezident Donald Trump ukrayin ve avropalı liderlernen alâqada qalalar.
